جبهة التهييس الشعبية

ممكن يبقى ايمن الظواهري هو اللي اون لاين، لكن انا مش في القاعدة والله العظيم، ثم ان هاوس نيجرو دي مش اختراعي، ده انا واخداها من مالكوم اكس، ثم ان مالكوم اكس مش بتاعي، ده حتى مالك هو اللي مالكوم اكس يا بيه، مش انا، وهو اللي مدونته اسمها مالكوم اكس، ثم هو اللي جابني التدوين انا كنت في حالي والله العظيم، وكنت مواطنة صالحة باكتب في الجرانيل زي اي مواطن صالح ومحترم، زيي زي اكسلانت ناوناو يافندم
الظواهري النهاردة طالع يقول على اوباما هاوس نيجرو
تبقى داهية لو بن لادن قال عليه جلد اسود اقنعة بيضاء
كده يبقى اشوفكوا في جوانتانمو بقى الحمد لله ان جوجل لطشت التاج بتاعي اللي كنت عاملاه
I m a field negro
طب ليه كده يا دوك طاه؟ حضرتك تشرفنا على المدونات بس تودينا في داهية ليه يا داكترة؟

(ن)

مدونتي هي تالت مدونة بعد
http://www.epitaph-87.blogspot.com/
وشهروزة
وبعدين انا، انا باقترح اننا نحدد ساعة صفر، بعد ما نكون نقلنا كل مدوناتنا على وورد برس، نحدد ساعة صفر ونتفق على ساعة كلنا في لحظة واحدة نلغي مدوناتنا من على جوجل، لان احمد البوهي بقى بيطلع له الرسالة الجديدة دي كمان
قلتوا ايه؟
الحاضر يعلن الغايب
النهاردة ايه؟ 19 نوفمبر
طيب نديهم عشر ايام كويس؟ وللا كتير عشر ايام؟
انا في انتظار اقتراحاتكوا وبعدين نشوف ح نعمل ايه، اهم حاجة كل واحد فيكوا دلوقت حالا يروح يعمل امبورت لمدونته

(ن)

We are a group of Egyptian bloggers really bothered by the blockage of the blogs Gabhet el tahhyes, Epitaph and Shahroza, along with the mail account of the later since November 14th 2008.Both bloggers have sent you their problem and requests on Google Help Center and Blogger Support, but in vain.We wish that you'd help us retrieve that blog and account and answer the requests of the two bloggers, and hopefully ASAP!Just for notice, we have published this problem on our blogs greetings

يا جماعة فيه حاجة جديدة احمد البوهي قال لي عليها: قال لي ان المدونة الجديدة بتاعته بتقول له ان مافيش بوست ح ينزل الا بعد مراجعة الادارة!
لا كده بقى لازم كلنا دلوقت حالا نعمل امبورت على الوورد برس وكحركة احتجاجية لازم نسيب جوجل تضرب تقلب بقى
دي سياسة جديدة بقى
شكل المربع اتغير وما كانتش بتنزل، وبعدين بعد ما عملت ايديت رجعت شكل المربع تاني
دلوقت فيه مدونة تانية اسمها شهروزة مدونتها وايميلها اتلغوا من جوجل
معلش يا شباب، دي مش ح تبقى جدعنة معايا انا ولا حاجة، دي ح تبقى من قدم شيء بيداه التقاه وهنيالك يا فاعل الخير والثواب عشان ح تصحوا بعد كده تلاقوا مدوناتكوا انتوا كمان اتلغت
لازم تكتبوا جواب بالانجليزي وتطلبوا فيه اعادة ارشيفي واعادة مدونة شهروزة وحسابها
احنا محتاجين تصييح اكتر من كده
وزي ما قلنا، جوجل مليانة بيديوفيليا، اللي هي جنس اطفال، والمفروض اصلا كلنا نبلغ على جوجل دي ونحبسهم كلهم عشان دي مجرمة دوليا

عاجل: مدونتي مش بتنزل البوستات الجديدة ولما اعمل سيف للبوست يقول لي form errorsالفورم ايرورز دي تيجي منين؟ المهم اني لما باعمل ايديت بيتعمل ايديت، كمان مدونة شهروزة اتوقفت وكمان وقفوا لها حساب الايميل بتاعهالا بقىكده محتاجين تصييح جامد يا شباب، اكتبوا على مدوناتكوا لجوجل جوابات لان كده شهروزة الاول وبعدين انا بعدها بتاني يوم، والموضوع مش موضوع شكاوى بقى معلش، جوجل مليانة حاجات خارجة عن القانون بما فيها جنس الاطفال المحرم دوليا واللي بينزله على الكمبيوتر بتاعه بيتحبس
الطبقة المتوسطة تحترم نفسيتها بقى وتتلم، هم اصلا 15 في المية وماسكين كل حاجة ونازلين عمايل زي الناس في دماغناانا مستاءة جدا من حلقة العاشرة مساء النهاردة
الموضوع وما فيه ان مجلس الوزرا عمل استطلاع رأي على عينة من المصريين وطلعت النتيجة كالآتي:
هل انت سعيد في حياتك؟
الحمد لله (80%)
طب راضي عن وضعك الاقتصادي؟
بصراحة لا (75%)
هل انت فخور انك مصري؟
اه طبعا فخور قوي اني مصري (80%)
مستعد لو قامت حرب تموت عشان مصر؟
طبعا (80%)
تحب تشتغل في القطاع العام وللا الخاص؟
الخاص
تحب نظام الخصخصة وللا القطاع العام؟
العام
طيب انا شايفة النتائج دي منطقية جدا والمفروض ان اي حد مصري بينزل الشارع وبيركب مواصلات وبيتكلم مع سواقين التاكسي (ومش لازم يشتغل في العشوائيات يعني) يبقى فاهم الكلام ده جاي منين
نفسي اعرف بقى ايه وجه السخرية والتريقة من الاستاذة منى الشاذلي والدكتور الرخاوي والاستاذ ايمن الصياد على المصريين
ومرة يتهموهم انهم فشارين وكدابين، ومرة يقولوا الكلام متناقض، ومعقولة يعني المصريين فخورين بمصريتهم اكتر من الالمان امال بيرموا نفسهم في البحر ليه؟
طيب هم بيرموا نفسهم في البحر وبيحبوا مصر، وهم هربانين من الفقر مش هربانين من مصر، واللي هم ما استكملوهوش في وصلة السخرية من المصريين ان فيه احصائية بتقول ان المصريين اقل الجنسيات المهاجرة تخلي عن جنسيتهم الاصلية، وانهم ما بيعملوش كده غير في الدول اللي بتجبرهم على انهم يبقى عندهم جنسية واحدة وبيبقى اختيارهم الاول انهم يرجعوا ولو ما ينفعش يرجعوا بيضطروا يتنازلوا عن الجنسية المصرية، ولما استطلعوا رأي موظفين السفارات قالوا المصريين اللي بتخلوا عن جنسيتهم بييجوا السفارة وهم بيعيطوا، ولما بيقطع الباسبور على الشط لما بيوصل ايطاليا مش بيقطع جنسيته المصرية ده بيقطع اي وسيلة ترجعه تاني للفقر، زي ما تقول كده بيرمي بلاه على البلد اللي رايحها
واللي كمان هم مش واخدين بالهم منه، ان المصريين مش بيهاجروا الى ابد الابدين، دايما بيرجعوا، ودايما بيبقوا مهتمين ان لما ربنا يفتح عليهم في الغربة يبقى عندهم بيت هنا في مصر، ولازم يبقى بيت ملك
انا اتضايقت جدا وعيطت
كون ان الطبقة المتوسطة ساخطة ومش بتحب مصر ومخنوقة منها ومحتقرة الشعب المصري وكل واحد شايف نفسه خسارة في البلد، دي امراضهم هم ياريت ماحدش يسقطها على الشعب المصري لانهم مش بيمثلوا الشعب المصري، دول حتى ليل نهار يقولوا احنا بنضمحل...ياللا في داهية
انا اشتغلت فترة في العشوائيات، والناس فعلا دي اجاباتها: الحمد لله احنا احسن من غيرنا كتير....يوووه ده الدنيا ياما فيها بلاوي ده احنا في نعمة...بس لابد من كل بد تركبوا لنا عداد النور....وتساعدونا عشان جوزي بيعمل غسيل كلوي ومش معايا تمن الدوا...لو ينفع الواد اخويا يسافر في اي حتة يجيب قرشين....بس بلاش الخليج عشان مش بيحبوا مصر....مصر ح تلعب النهاردة مع الكاميرون...مصر ام الدنيا
طب اقول لكوا حاجة
في الاول خالص مالص، زمااااااان اول ما اشتغلت هناك، ايام ما كان اسطبل عنتر ده ادغال، اهالي اسطبل عنتر ما كانوش بيرضوا يتصوروا (دلوقت اقتنعوا بجدوى التصوير ومش كلهم برضه، فيه لسة بيزعقوا لنا لو صورناهم) عارفين ليه ما كانوش بيرضوا يتصوروا؟:
انتوا عايزين تصوروا عفانتنا عشان تشوهوا سمعة مصر؟ مصر فيها حتت حلوة كتير...مش كل المصريين زينا...امشوا من هنا يا ولاد الكلب يا اسرائيليين
انا عايزة افهم ايه العجيب في ان المصريين بيقولوا احنا مستعدين نموت عشان مصر لو حرب قامت؟
اولا المصريين ما عندهمش اي مانع يموتوا لاتفه السبب، واللي مش مصدق يشوف الناس بتعدي الشارع ازاي، دول ناقص يحبوا على رجل اللي سايق عشان يموتهم، ونسبة الخوف من الموت عندنا طول عمرها قليلة، ثم بقى انا بالاقي كتير قوي، خصوصا من اللي الغلابة، نفسهم ومنى عينهم ان يحصل حرب! نوع من انواع الاكسايتمنت يعني، الحقيقة مافيش غير الطبقة المتوسطة هي اللي بتخاف من الحرب، واللي فوقيها طبعا، اللي فوقيها انا مش باعتبرهم مصريين اصلا، المهم، اللي خايف من الحرب خايف عشان عنده حاجة يخسرها، لكن اللي انا اشغلت معاهم (خصوصا العيال بتوع الاحداث) حاسين ان الحرب دي بقى ح تبقى لعبتهم، وفرصتهم الوحيدة عشان يبقوا ابطال والبلد كلها تتوقع في عرضهم، عاملين زي اللي امه بتضطهده وبتطلع عينه وبتفضل اخوه عليه، ونفسه ومنى عينه انها تعيا عشان يتبرع لها بكليته ويموت عشانها بس عشان تعرف قيمته وتحبه زي ما هو بيحبها
وهم محقين فعلا
مين اللي مشي على الالغام بالالاف وصد بجسمه فوهات المدافع في حرب تلاتة وسبعين؟ مش العساكر الفلاحين والصعايدة الغلابة؟
اما بخصوص انه عايز يشتغل في القطاع الخاص لكن عايز كل حاجة تبقى تبع القطاع العام
فده مفهوم، هو دلوقت حالا عايز يشتغل في القطاع الخاص عشان فلوسه اكتر، لكن يتمنى ان كل حاجة تبقى تبع القطاع العام لاني سبق وقلت لكوا المصريين شيوعيين بالسليقة، الثقافة الابوية بتخليهم عايزين كل حاجة تبقى في ايد الدولة عشان يبقى فيه عدالة
الحقيقة انا مش شايفة غرائبية في نتائج الاستطلاع، ولا شايفة تناقض اذا اتكلمنا عن السياق المصري وتصارع الشخصية المصرية وموروثها مع الواقع المفروض عليها، ايه ده؟ انا باقول ايه؟ ايه الجملة الاخرانية دي؟ المهم انتوا فاهميني يعني احنا عشرة
ولا شايفة اي داعي للتريقة على المصريين والسخرية منهم واتهامهم بالكدب وانهم هم اللي المشكلة فيهم مش المستطلعين
الحقيقة المشكلة مش فيهم ولا في المستطلعين، المشكلة في النظام اللي بيحطهم في صراع ما بين القيم اللي هم مؤمنين بيها وما بين الظروف الصعبة المفروضة عليهم
وايوة المصريين لسة بيحبوا مصر، ولسة فخورين بيها لدرجة انهم ساعات يستعروا من نفسهم عليها، يعني شايفين ان مصر مقامها اكبر منهم، وكتير بيعملوا زي اللي مش بيرضوا يتصوروا عشان مستعفنين نفسهم ومحرجين لمصر منهم، ودي تركيبة ما يفهمهاش اللي قاعد معزول عن الناس
والرضا بقضاء الله حاجة وزنقة الفلوس وصعوبة المعيشة حاجة تانية
وقرفهم من العيشة حاجة وحبهم لمصر واستعدادهم انهم يموتوا عشانها حاجة تانية
هم اصل المتحدثين تعليم خواجاتي شوية، عندهم التصور الخواجاتي بتاع ان الوطن هو اللي بيدي الواحد حقوق وبيوفر له حياة كريمة
واحنا من امتى في مصر كان عندنا التصور ده عن الوطن؟ اذا كنا لما بنهاجر بنعمل فول وطعمية وبنوسخ الاماكن اللي احنا عايشين فيها عشان تبقى شبه مصر، ونعمل قهاوي ونعمل تجمعات مصرية ونتخانق نفس الخناقات وننزل في الشارع نحتفل بفوزنا بكاس افريقيا، مش كل من هاجر بقى ما عندوش انتماء
ولا زهق من البلد ولا ده معناه ان ما يتمناش يموت عشانها
والناس لما بتقول مصر هي امي، هم حاسين انها امهم بجد، حتى لو ام رخمة وبترنهم علقة بالحزام، ويتخانقوا معاها ويطفشوا ويروحوا يباتوا عند واحد صاحبهم، بس امهم، حد ح يكره امه؟
انا مش طالبة منهم ينزلوا العشوائيات (مع مراعاة انهم يلبسوا لبس بسيط شوية عشان يحسسوا الناس انهم منهم) انا بس عايزاهم مرة كل ست شهور يركبوا المواصلات وللا حتى ياخدوا تاكسي عشان ما يبقوش قاعدين كده مندهشين من اختراع العجلة ومش دريانين بجوانيات اهلهم
ولما هم اللي ما يفهموش
ولما هم اللي ينعزلوا
يطلعوا ان الشعب هو اللي وحش وهو اللي كداب وهو اللي مش معقولة ابدا يبقى عنده انتماء واكيد نصاب
ويقعدونا قدامهم ساعة يبستفوا فينا هم ومتصلينهم اللي لاوئين ضبتهم
اما عاجيب والله
وتحية للدكتور ماجد عثمان
اه، نسيت اقول حاجة، الناس قالت احنا مستعدين نموت عشان مصر، تقوم الاستاذة منى في اخر الحلقة تقول، ياريت نقول الحقيقة عشان استطلاعات الرأي دي بتفيدنا يعني لما حد يقول لك مستعد تموت في حرب قول اللي جوة نفسك
يعني كأنه تحريض للمصريين على انهم ما يموتوش عشان بلدهم وتسفيه للناس واللي يقول انا اموت عشان بلدي يبقى كداب
امممممممممما عجااااااااااااايييييييييييييبببببببببببببببب فعلااااااااااااااا

عرفت دلوقت من بيللا ان اسم القاضي اللي حكم بوقف تصدير الغاز للكيان الصهيوني هو: المستشار محمد احمد عطية
ياللا بقى شددوا له الدعوات، انا نازلة دوقت بقى رايحة النقابة ان شاء الله
وكل الناس فرحانة، مواطن مصري فرحان، وندى القصاص فرحانة وطفاطيفو فرحان وكمان جابلي الفيديو
وانا كمان فرحانة قوي
الف مبروك
صدر قرار بوقف تصدير الغاز لاسرائيل
على فكرة انا ح اقوم البس وانزل اروح النقابة عشان ندوة لا للحصار لا للتطبيع واظن في ظل الظروف الحلوة دي لازم كلنا نروح
انا مبسوطة قوي
عشان تعرفوا بس ان لما بيبقى فيه حاجة حلوة كلنا بنجتمع عليها، كل الناس فرحانة بس انا قلت التلات اسامي لتلات ناس مختلفين عن بعض خالص
شوفوا الحاجة الحلوة بتجمعنا كلنا ازاي؟
ايه تلات ناس؟ انا قلت تلات ناس؟
المهم سمعونا زغرودة لجل النبي

الارشيف بتاعي مش عايز يرجع ما رجعش منه غير 282 بوست
يا اخوانا ما تصيحوا معايا على جوجل انا مش باعرف اصيح لنفسي، دي حتى حاجة لوجه الله ماحدش ضامن بوستاته ولا جوجل شيلاله ايه؟

يا ترى انت نصاب عشان تربيتنا وسقيناك النصب اللي فيه مننا بيروحوا يمارسوه على الخواجات؟ وللا اخدت النصب من ثقافة بيع الهوا الامريكاني بعد ما يعبوه في علبة شكلها حلو ويعملوا لها دعاية؟
هو الشهادة لله احنا نصبنا اطيب كتير، نصب ناس غلابة وخايفين، لكن نصب الفرع التاني بتاعك نصب ناس قوية ومفترية وغيتها المتاجرة في البني ادمين، واسم الله عليك جمعت الفخر من اطرافه
لا وايه، بقى ممنوع حد يشتم اوباما دلوقت! اه والله، فيه تنبيهات في الحكومة المصرية انهم يجروا ناعم مع اوباما
ما داهية يا مدهول تكون رايح لهم من عندنا بفكرة الزعيم الاوحد وح تعمل لهم عبد الناصر الامريكاني!
ههههههههههههه احسن، يستاهلو، واهم واقعين لشوشتهم فيك وهلاهوطة ومدلدلين ودانهم، عشان يعذرونا بس
يا ترى انت بتكرهنا عشان لما اتربيت وسطنا عاملناك وحش مثلا؟ وللا عشان عايز تتنطق بقى وتنسى اصلك واحنا بنفكرك بيه؟ طيب يا كابتن اللي عنده اصل لما رئيس عربي يتصل بيه يهنيه على الاقل يرد المكالمة
قلة الاصل دي جايبها منين؟ من جدك اللي كان بيستعبد الناس؟ وللا من جدك التاني اللي كان اشباه جدك بيستعبدوه؟
الا الولية امك عملت العملة السودا دي فيك وخلتك الصبح بالليل ساعة ما الشروق يدخل في الغروب ليه؟ لا وقاطعة ابونيه مع المسلمين، مرة كيني ومرة اندونيسي
يا اوختشي والله السمعة اياها واللي خلتك تتجوزي مننا دي اوشاعات..اوشاعات والله اوشاعات، حتى اسألي فرانتز فانون
ده احنا حتى عندنا تيليوث

هي حصلت خمرة على الملأ؟ ما شاء الله يا استاذ، بكرة تشرب سجاير وتتفرج على ام بي سي ماكس اللي بتقطع الشتايم، وح يتجلد كام جلدة عليها دي؟
وبعد كل المسخرة دي بيحاور في الادياك؟

آه

الظاهر مصر ح يبقى مصيرها زي مصير المدونة، تختفي في ظروف غامضة وتظهر في شكل صكوك
يعني يا مصر كنت باقول واحشاني...تقومي ترجعي محافظ؟
طب محافظ جلد وللا قماش؟ اوعي يا بت تكوني بقيتي بوك

ما تقولوا كده من الاول، واحد بعت لي مسج على الموبايل ملخصة ومحترمة وفهمتها اخيرا: ح نشتري بلدنا اللي احنا اصلا دافعين فيها ضرايب
آآآآه، يعني البيت باسمي وانا ح اشتريه تاني عشان...عشان ايه بقى؟
يعني ده اعتراف ضمني من الدولة انها هي حاجة والشعب حاجة تانية، طيب، بياخدوا ضرايب ليه؟ الا انا شفت بلاد كتير وقليل، عرب وعجم، خواجات وولاد بلد، الا فرانكا والا تورك والا بيئة
ما شفتش ابدا شعب بيدفع في بلده كل الفلوس دي وما بياخدش منها ولا حتى صلاة النبي

لما حاجة جديدة تحصل في المدونة ابقوا قولوا لي
هو اللي اعرفه ان دلوقت فيه ستميت جبهة تهييس بتاعتي، يعني اللي بعت جوابات بيضرب نفسه بالجزمة دلوقت، منين ما ح يمشي ح يلاقي جبهة تييس

انا نوارة..هو ناصر هو اللي عمل كده؟
يا ناااااااااااااصررررررررررررر
ايه بقى؟ فهمني
ايه ده؟ دي التاجز بتاعتي كمان، يعني هم خلصوا مراجعة، وللا ده سيرفر، وللا ايه بقى؟ ها؟ اعمل ايه انا دلوقت؟ انا رحت البنك وقدمت على كارت نت وح يدهولي يوم 26 ان شاء الله، كانوا قالوا لي، قلت لمالك ينفع بكارت المكنة ضحك، ما اعرفش ليه؟
هو فين بقية الارشيف؟

الحمد لله، مصطفى طفاطيفو هو اللي بعت لي ع الجايكو الخبر ده، انا اصلي كنت في ندوة كدة مش عارفة اسمها ايه، تبع جمعية مجتمع مدني كده برضه فيها اي واس وحاجات كده، بس قابلت هناك جمال عيد وكريم البحيري وعمرو غربية ومنعم والدكتورة ليلى سويف، قلت مدام دول رايحين تبقى حاجة حلوة، انا بصراحة رحت عشانهم، وكانت هناك نهاد ابو القمصان وحسام بهجت وعدد من الناس اللي انا مش عارفاهم قاعدين على ترابيزة، وما اعرفش بقى هو انا اللي بقيت بايخة وللا الجلسة اللي ما كانش فيها حاجة جديدة، حتى كتبت كده لمنعم في ورقة واحنا قاعدين ضحك وما ردش عليا، وما اعرفش هو كلام الناس اللي انا رايحة عشانهم الوحيد اللي عجبني عشان انا باحبهم وللا عشان هو فعلا كلامهم الوحيد اللي يعجب؟
ما بقتش عارفة حاجة، انا بس حاسة ان فيه حاجة ما الى حد ما بالنوسبة لشيء ما
انا الظاهر كابس عليا النوم

دلوقت موضوع عايز حقي، من حيث المبدأ انا مش شايفة انه غلط، يعني لما يبقى لنا اسهم في القطاع العام مش احسن ما يتباع للمستثمرين الاجانب؟ نشتري وللا ما نشتريش
وللا هي البلد بتقع وبيرموها علينا ويجروا
اللي بيفهموا في الاقتصاد يفهمونا عشان لو حاجة كويسة نعملها، فيه كام مدون تخصصهم اقتصاد يشرحوا لنا الحكاية ويقولوا لنا ده حلو وللا وحش ده