Goodbye Abdooo

مش أول مرة أخسر واحد من الناس اللى باحبهم وباحترمهم.. لكن المرات الاخيرة بتيجى فى ناس قريبة منى... ويمكن ناس احسن منى بكتير ونهايتهم بتكون نهاية احسن من انى ازعل عليهم، لكن وجع القلب مش حاجة ممكن اتحكم فيها.. خسرت ناس كتير فى حياتى.. ياسر ابن خالى وبعده بكام سنة هالة أخته.. رمضان زميلى فى الكلية وانا فى بكالوريوس... دينا أخت زميلى فى الشغل مع انى ما كنتش أعرفها لكن مجرد ان تحس ان الموت قريب.. وبعدين منة الله البنت المحترمة المتدينة اللى فى ثانوية عامة وعينيها مليانة شقاوة وما بتبطلش  تغلس علينا طول ما احنا بنعمل أى حاجة فى صناع الحياة.. ودلوقتى أحمد عبد العال اللى مات فى السعودية وهو فى طريقه للحج..

أحمد كان معايا فى الشغل فى eSpace.. كان java developer.. لسه خاطب قريب.. انسان لما تشوفه لازم تحترمه حتى لو اختلفت معاه فى الرأى.. لازم اقول انى احترمته من أول ما عرفته مع انى ما عرفتوش غير كام شهر.
فى كتب كتابى كنت جايب حبة كتيبات دينية فى مواضيع مختلفة وباوزعهم، منهم كان كتيب صغير عن عمر بن عبد العزيز. لما شافنى تانى يوم فى الشغل طلبه منى علشان كان نفسه يقراه وما لحقش ياخده. كسلت كتير على ما اشتريتهوله وبعدين نسيت اديهوله. افتكرت وانا باقرا خبر وفاته يوم الوقفة.. يا الله.. مات وهو فى الاوتوبيس رايح مكة علشان يحج.. يمكن يكون مات بيلبى ويبعث يوم القيامة بيلبى.. ربنا يكرمه ويتقبل منه.
ان شاء الله مش حننساك يا أحمد.. الكتاب اللى ما اديتهولكش معايا.. وان شاء الله حاخليه معايا.. وزى ما انت كنت بتقول انك بتحب عمر بن عبد العزيز ونفسك تتعلم منه، لما سمعت خبر وفاتك افتكرت اخر خطبة ليه قبل ما يموت:

إنكم لم تخلقوا عبثاً ولن تتركوا سدى وإن لكم معاداً ينزل الله فيه للفصل بين عباده فقد خاب وخسر من خرج من رحمة الله التي وسعت كل شيء وحرم جنة عرضها السموات والأرض ألا ترون أنكم في أسلاب الهالكين وسيرثها بعدكم الباقون كذلك حتى ترد إلى خير الوارثين...وفي كل يوم تشيعون غادياً ورائحاً إلى الله قد قضى نحبه وانقضى أجله فتودعونه وتدعونه في صدع من الأرض غير موسد ولا ممهد قد خلع الأسباب وفارق الأحباب وسكن التراب وواجه الحساب غنياً عما خلف فقيراً إلى ما أسلف فاتقوا الله عباد الله قبل نزول الموت وانقضاء مواقيته وأني لأقول لكم هذه المقالة وما أعلم عند أحد من الذنوب أكثر مما أعلم عندي ولكن أستغفر الله وأتوب إليه.....

ربنا يرحمك يا أحمد.. وربنا يثبت أهلك وخطيبتك ان شاء الله.